ICT ინსტიტუტი
|
ნოდარ უღრელიძე ინსტიტუტის დირექტორი, პროფესორი ელ-ფოსტა: n.ugrelidze@ug.edu.ge
1978 წელს დაამთავრა საქართველოს პოლიტექნიკური ინსტიტუტი და მიენიჭა რადიოინჟინრის კვალიფიკაცია. 1984 წლამდე იყო ლენინგრადის ელექტროტექნიკური მოწყობილობების სამეცნიერო-კვლევითი ინსტიტუტის თბილისის ფილიალის პირველი კატეგორიის ინჟინერ-კონსტრუქტორი. 1984-1987 წლებში იყო ქ. ოდესის კავშირგაბმულობის ელექტროტექნიკური ინსტიტუტის ასპირანტი, სადაც 1988 წელს დაიცვა საკანდიდატო დისერტაცია და მუშაობა დაიწყო თბილისის სახელმწიფო უნივერსიტეტში მეცნიერ-თანამშრომლად. 1990 წლიდან საქართველოს ტექნიკური უნივერსიტეტის თანამშრომელია, სადაც 1994 წელს დაიცვა სადოქტორო დისერტაცია და დაიკავა პროფესორის თანამდებობა. 2022 წლიდან საქართველოს უნივერსიტეტის თანამშრომელია. კითხულობდა ლექციების კურსს გერმანიაში, დარმშტადტისა და ულმის უნივერსიტეტებში. გამოქვეყნებული აქვს 100-ზე მეტი სამეცნიერო ნაშრომი, მათ შორის 4 მონოგრაფია. არის რამოდენიმე სამეცნიერო გრანტის მფლობელი. |
|
|
|
ICT ინსტიტუტის მიზანია გააძლიეროს უნივერსიტეტის კვლევითი პოტენციალი, ხელი შეუწყოს მეცნიერებაზე დაფუძნებული სწავლებას და თავისი საქმიანობით აამაღლოს უნივერსიტეტის ცნობადობა და მისი რეიტინგი საერთაშორისო სასწავლო-სამეცნიერო წრეებში.
პროექტები
,,5G ტექნოლოგიები, გამოწვევები და გადაწყვეტილებები“
2023 წლის 22 ივლისს საქართველოს უნივერსიტეტში, ინფორმაციისა და კომუნიკაციის ტექნოლოგიების ინსტიტუტის ინიციატივით, გაიმართა სამეცნიერო-ტექნოლოგიური კონფერენცია სახელწოდებით ,,5G ტექნოლოგიები, გამოწვევები და გადაწყვეტილებები“. მისი გამართვა განპირობებული იყო საქართველოში 5G სისტემის დანერგვის გადაწყვეტილებით. ინფორმაცია კონფერენციის ჩატარების განზრახვის შესახებ მიეწოდა საქართველოში არსებულ პრაქტიკულად ყველა კომპანიას თუ სტრუქტურას, რომელიც რაიმე სახით უკავშირდება საკომუნიკაციო ტექნოლოგიებს. კონფერენციაზე მოხსენებები წარადგინეს საქართველოს რამდენიმე უნივერსიტეტის წარმომადგენლებმა (მოხსენებების შემოკლებული ვარიანტები დაიბეჭდა). ამასთან, კონფერენციას ესწრებოდა საქართველოს უნივერსიტეტის თანამშრომლები, მაგისტრანტები და დოქტორანტები.
კონფერენცია ინტენსიური დღის წესრიგით წარიმართა; სამუშაო დღის პირველი ნახევარი დაეთმო მხოლოდ იმ მოხსენებებს, რომლებიც შეეხებოდა ძირითად ტექნიკურ განსხვავებებს 4G და 5G ტექნოლოგიებს შორის, ხოლო მეორე ნახევარში წარიმართა დისკუსია 5G ტექნოლოგიის საქართველოში დანერგვის თავისებურებების შესახებ. გამოითქვა მოსაზრება (პროფ. ნ. უღრელიძე), რომ ისეთი სისტემების მიმართ მხარდაჭერა, რომლებიც, ძირითადად, 4G-ს განასხვავებს 5G-სგან (IoT ქსელები, მაღალი დონის სათამაშო პროგრამები, თვითმავალი სატრანსპორტო საშუალებები, მძლავრი მულტიმედიური ტექნოლოგიები, ხელოვნურ ინტელექტთან დაკავშირებული აპლიკაციები და სხვა) ჩვენი ქვეყნის ტექნოლოგიური და შესაბამისი ინფრასტრუქტურის განვითარების პირობებში ვერ იქნება სრულყოფილად რეალიზებული. შესაძლოა 5G-ს დანერგვის პროცესი ისე გაჭიანურდეს, რომ საერთოდ მოგვიხდეს 5G-ს გამოტოვება და პირდაპირ 6G-ზე გადასვლა. ამ საკითხთან დაკავშირებით პროფ. გ. მურჯიკნელმა აღნიშნა, რომ მიუხედავად ტექნოლოგიური მიზანეწონილობისა ასეთი ,,ნახტომის“ გაკეთება ვერ იქნებოდა გამართლებული და დეტალურად განმარტა მიზეზები. სხვადასხვა მოსაზრება გამოთქვეს კონფერენციის სხვა მონაწილეებმა. გამართულ პოლემიკაში, საბოლოოდ, გამოიკვეთა აზრი, რომ გადაწყვეტილება ამ და მსგავსი პროექტების დანერგვასთან დაკავშირებით უნდა მიიღებოდეს მაღალკომპეტენტური სპეციალისტების ფინანსურ-ეკონომიური და ტექნოლოგიური რეკომენდაციებისა და დასკვნების საფუძველზე. ამის შემდგომ კონფერენციამ დაამთავრა მუშაობა.
