ეკატერინე მაღლაკელიძე დაიბადა 1969 წლის 1 მაისს ქ. თბილისში. 1986 წელს
დაამთავრა თბილისის 126-ე საშუალო სკოლა და ჩააბარა ივ. ჯავახიშვილის სახელობის
თბილისის სახელმწიფო უნივერსიტეტში ვაჭრობის ეკონომიკისა და საქონელმცოდნეობის
ფაკულტეტზე, რომელიც წარჩინებით დაამთავრა 1991 წელს. ამავე წელს ჩაირიცხა
ასპირანტურაში, რომელიც დაამთავრა 1994 წელს. 2006 წელს დაიცვა საკანდიდატო
დისერტაცია თემაზე „ელექტროენერგიით ვაჭრობის სრულყოფის ღონისძიებები
საქართველოში“ და მიენიჭა მეცნიერებათა კანდიდატის (დოქტორთან გათანაბრებული)
ხარისხი. ამჟამად, ეკატერინე მაღლაკელიძე არის „საქართველოს უნივერსიტეტის“ ასოცირებული პროფესორი. მიყავს მარკეტინგის კურსი ბაკალავრიატის და მაგისტრატურის
საფეხურზე. იმავდროულად, არის სამაგისტრო თემების ხელმძღვანელი და ექსპერტიც. მისი
ხელმძღვანელობით „საქართველოს უნივერსიტეტში“ დაცულია სამი საკანდიდატო
დისერტაცია. პირველი დისერტაცია თემაზე: „ინტერნეტ-სავაჭრო ვებ-გვერდის აგებულების გავლენა მომხმარებლის
მსყიდველობით ქცევაზე“; მე-2 საკანდიდატო დისერტაცია თემაზე: "მომხმარებლის ქცევის მოდელირება ამბულატორიული სერვისებით სარგებლობის პროცესში"; მე-3 საკანდიდატო დისერტაცია თემაზე: "კორპორაციული სოციალური პასუხისმგებლობის (კსპ) ცხადგრძნობის გავლენის შეფასება კორპორაციულ ნდობაზე მყიდველების პოზიციიდან". მისი ხელმძღვანელობით მზად არის მე-4 საკანდიდატო
დისერტაციაც, რომლის დაცვაც, სავარაუდოდ, შედგება 2024 წლის დასაწყისში. იმავდროულად, ეკატერინე მაღლაკელიძე აგრძელებს მუშაობას ელექტროენერგიით
ვაჭრობის საკითხებზე. კერძოდ, მისი კვლევის ობიექტია მოთხოვნის მხარის რესურსების
ჩართვა ენერგოდაზოგვაში DSRs პროგრამების დახმარებით. აღნიშნული პროგრამები
მრავალწახნაგიანია და ბევრ სხვა ღონისძიებასთან ერთად გულისხმობენ შინამეურნეობების
მიერ ენერგიის საკუთარი წყაროების შექმნას ალტერნატიული წყაროების (მზის ენერგია, ქარის ენერგია, ბიომასა და ა.შ.) გამოყენების ხარჯზე. ეს არის ამერიკასა და ევროპაში კარგად
აპრობირებული ე.წ. „საპასუხო მოთხოვნის პროგრამები“, რომელთაც აქვთ პოტენციალი
დაეხმარონ ელ. ენერგიის მომხმარებლებს, რომ შეიმცირონ ელ. ენერგიის ხარჯები. თუ, თავდაპირველად, მაღალი და საშუალო ფენა დათანხმდება მონაწილეობა მიიღოს ენერგოდაზოგვის პროგრამებში,
ამ შემთხვევაში ელ. ენერგიის ტარიფი შეუმცირდებათ არა მხოლოდ პროგრამაში ჩართულ
შინამეურნეობებს, არამედ ელ. ენერგიის ყველა მომხმარებელს და ეს იქნება ამ პროგრამებიდან
მიღებული საერთო სოციალური სარგებელი. აღნიშნულ საკითხებზე ეკატერინეს დაწერილი აქვს რამდენიმე სამეცნიერო სტატია,
რომელთა წარდგენა მოხდა ვენაში, ლისაბონში, პარიზში, თურქეთში გამართულ საერთაშორისო
კონფერენციებზე, შესაბამისად, 2017-2022 წწ.-ში, რომლებზეც ეკატერინე „საქართველოს
უნივერსიტეტის“ სახელით გამოვიდა. პედაგოგიურ-სამეცნიერო მოღვაწეობასთან ერთად, ეკატერინე მაღლაკელიძე, აგრეთვე, მუშაობს შპს „ელექტრონში“ 2001 წლიდან. აღნიშნული კომპანია ამჟამად
ახორციელებს გზების, მაგისტრალებისა და გვირაბების განათების პროექტებს
საქართველოში, ასევე, მოღვაწეობს ტელეკომუნიკაციების სექტორშიც და, იმავდროულად, ასრულებს საპილოტო პროექტებს მზის ენერგიის გამოყენებასთან დაკავშირებით
საქართველოს რიგ რაიონებში.
