საქართველოს უნივერსიტეტის საჯარო მმართველობის სამაგისტრო პროგრამის მიზანია დემოკრატიული აზროვნების, მაღალკვალიფიციური და კონკურენტუნარიანი საჯარო მმართველების მომზადება, ახალი საჯარო ლიდერების გამოვლენა და წარმოჩენა, რომლებსაც პოლიტიკის ცვლილების, ღია მმართველობის პრინციპებზე დაყრდნობით და ახალი ხედვებისა თუ ტრანსფორმაციული ცვლილებების გზით შეეძლებათ წვლილი შეიტანონ საქართველოს საჯარო მმართველობის არსებული სისტემის გაუმჯობესების პროცესში.

დღეს, საქართველო საჯარო ადმინისტრირების რეფორმისა და განვითარების ეტაპზეა, რაც მმართველობის ძველი სისტემიდან ახალ, დემოკრატიულ ღირებულებებსა და კარგი მმართველობის პრინციპებზე დაფუძნებულ, ღია მმართველობის ფორმების დამკვიდრებასა და სერვისზე ორიენტირებული საჯარო ინსტიტუტების ჩამოყალიბებას გულისხმობს. მიმდინარე ადმინისტრაციული რეფორმები თუ საჯარო პოლიტიკური ცვლილებები, ევროატლანტიკურ სივრცეში ინტეგრაციის პროცესი თუ საჯარო სერვისების დასავლური სტანდარტების შესაბამისად უზრუნველყოფა მართვის მრავალ კონცეპტუალურ და პრაქტიკულ სირთულეს იწვევს. ქვეყნის დემოკრატიული განვითარების გზაზე ამ უმნიშვნელოვანესი ცვლილებების წარმატებით განხორციელება კი სწორედ მაღალკვალიფიციურმა და პროფესიონალმა საჯარო მმართველებმა უნდა უზრუნველყონ.

შესაბამისად, საჯარო ადმინისტრირების სამაგისტრო პროგრამა მიზნად ისახავს კურსდამთავრებულებს მისცეს მრავალმხრივი და სიღრმისეული ცოდნა საჯარო ადმინისტრირების მენეჯერულ, პოლიტიკურ და სამართლებრივ კონტექსტში, ჩამოუყალიბოს კრიტიკული აზროვნებისა კრეატიული ხედვის უნარი, უზრუნველყოს მაქსიმალური შესაძლებლობებისა და ლიდერობის პოტენციალის გამოვლენა, რაც ხელს შეუწყობს როგორც კურსდამთავრებულის დასაქმებასა და კარიერულ წინსვლას, ასევე ქვეყანაში არსებული საჯარო მმართველობითი პროცესის ხარისხის გაუმჯობესებას.

კურსდამთავრებულს:

• აქვს საჯარო ადმინისტრირებისა და საჯარო პოლიტიკის სფეროს სიღრმისეული ცოდნა და შეუძლია სფეროში პოლიტიკურ-ადმინისტრაციული პროცესებისა და მიმდინარე რეფორმების შესახებ დასაბუთებული მსჯელობა, ანალიზი და შეფასება; ასევე შეუძლია საჯარო ადმინისტრირების და მომიჯნავე მიმართულებებში ცოდნის დამოუკიდებლად გაღრმავება;
• აქვს საჯარო ადმინისტრირების სფეროს სამართლებრივი ბაზისის: მმართველობის კონსტიტუციური საფუძვლების, მუნიციპალური და ადმინისტრაციული სამართლის, საჯარო სამსახურის სისტემისა და საჯარო დაწესებულების ფუნქციონირების შესახებ სისტემური ცოდნა და შეუძლია საჯარო ადმინისტრირების სამართლებრივ რეგულირებასთან დაკავშირებულ საკითხებზე მსჯელობა და მათი კრიტიკული შეფასება;
• შეუძლია პოლიტიკური აზრისა და იდეოლოგიების, ასევე მიკროეკონომიკური და მაკროეკონომიკური ფაქტორებისა და კანონზომიერებების საჯარო პოლიტიკისა და მმართველობით პროცესებთან ურთიერთკავშირის, გავლენისა და ზემოქმედების იდენტიფიცირება და ანალიზი;
• შეუძლია საჯარო ადმინისტრირების და მომიჯნავე მიმართულებებში კვლევის დამოუკიდებლად განხორციელება: კვლევის დიზაინის და მეთოდოლოგიის მომზადება, თვისებრივი და რაოდენობრივი მეთოდების გამოყენებით აკადემიური და გამოყენებითი კვლევის წარმოება, კვლევის შედეგების ანალიზი და პროფესიული აუდიტორიის წინაშე წარდგენა; ასევე სფერში განხორციელებული კვლევითი პროექტების მეთოდოლოგიის და შედეგების კრიტიკული შეფასება;
• აქვს საჯარო ადმინისტრირების ორგანიზაციული კონტექსტის, საჯარო/სახელმწიფო, სამოქალაქო საზოგადოებრივი და არაკომერციული ორგანიზაციების მართვის თავისებურებების სისტემური ცოდნა;
• შეუძლია საზოგადოებრივი პრობლემის გადაჭრის ან მოცემულობის გაუმოჯებესების მიზნით საჯარო პოლიტიკის ანალიზის მეთოდოლოგიის გამოყენებით რაციონალური, ობიექტური და პოლიტიკურად მიუკერძოებელი მოქმედების კურსის შერჩევა, პოლიტიკის დოკუმენტის შემუშავება და პროფესიული აუდიტორიის წინაშე წარდგენა;
• შეუძლია საჯარო მმართველობის სფეროში დამკვიდრებული სტანდარტების შესაბამისი პროექტის დაგეგმვა, განხორციელება, მონიტორინგი და შეფასება;
• აქვს საჯარო სერვისების წარმოქმნის, მიწოდების პოლიტიკისა და განხორციელების თავისებურებების სიღრმისეული ცოდნა და შეუძლია საჯარო სერვისის პოლიტიკის განსაზღვრისა და განხორციელების დაგეგმვა, პროცესის მართვა და შეფასება;
• საჯარო მმართველობის ეთიკისა და პრინციპების, პოლიტიკური მიუკერძოებლობის, ეფექტიანობის, ანგარიშვალდებულების, პატიოსნების და სამართლიანობის ღირებულებებზე დაყრდნობით შეუძლია ღია, შედეგზე ორიენტირებული და კარგი მმართველობის პრინციპების დამკვირდება