საქართველოს უნივერსიტეტი და კაფე-სანაყინეების ქსელი ლუკა პოლარე თანამშრომლობის ახალ ეტაპს იწყებენ - პარტნიორობას, რომელიც განათლებასა და ბიზნესს საერთო მიზნის გარშემო აერთიანებს: ახალგაზრდებისთვის უკეთესი შესაძლებლობების შექმნა და მათი პროფესიული განვითარების მხარდაჭერა.
პროგრამის მიზანია იმ სტუდენტი თანამშრომლების მხარდაჭერა, რომლებიც სწავლას და პროფესიულ საქმიანობას ერთმანეთთან წარმატებით აერთიანებენ. ინიციატივა ეფუძნება რწმენას, რომ თითოეული სტუდენტის მიღმა დგას მიზანი, შრომა და მომავლის ხედვა - რესურსები, რომლებიც სწორ მხარდაჭერას საჭიროებს.
სტიპენდიის პროგრამა მოიცავს როგორც მოქმედ თანამშრომლებს, ისე იმ ახალგაზრდებს, რომლებიც მომავალში შეუერთდებიან ლუკა პოლარეს გუნდს. მონაწილეები შეირჩევიან კონკურსის საფუძველზე, სადაც აკადემიურ მოსწრებასთან ერთად შეფასდება პროფესიული პასუხისმგებლობა, დისციპლინა, სამუშაო ეთიკა და მენეჯერული უკუკავშირი.
პროგრამის ფარგლებში სტიპენდიანტები აგვისტოს ბოლოს გამოვლინდებიან, ხოლო მხარდაჭერას ახალი სასწავლო წლიდან მიიღებენ. განაცხადების მიღება ხდება შესაბამისი ფორმის საშუალებით, მათთვის, ვინც ივლისის თვეში შემოუერთდება ლუკა პოლარეს გუნდს.
ეს პარტნიორობა წარმოადგენს ბიზნესისა და აკადემიური სივრცის თანამშრომლობის მნიშვნელოვან მაგალითს - როდესაც კერძო სექტორი და უნივერსიტეტი ერთობლივად ზრუნავენ არა მხოლოდ დღევანდელ შედეგებზე, არამედ მომავალი თაობის განვითარებაზე.
საქართველოს უნივერსიტეტისთვის მსგავსი თანამშრომლობა უნივერსიტეტის მისიის ნაწილია - შექმნას გარემო, სადაც განათლება რეალურ შესაძლებლობებს უკავშირდება, სტუდენტები კი, ცოდნის პარალელურად პრაქტიკულ გამოცდილებასა და პროფესიულ მხარდაჭერას იღებენ.
