29 მაისს, საქართველოს უნივერსიტეტმა EPAM Georgi-იას ორგანიზებულ ღონისძიებას „Data Talk with EPAM at the University of Georgia“ უმასპინძლა. ღონიძიებაზე მოსულ სტუდენტებსა და პროფესიონალებს მონაცემთა სფეროს შესახებ სასარგებლო ინფორმაციის, აუცილებელი უნარებისა და კავშირების მიღების შესაძლებლობა ჰქონდათ.

EPAM Georgi-იას ექსპერტებმა მონაცემთა და ანალიტიკის სფეროში წარმატებული კარიერის შექმნისთვის სხვადასხვა როლების მამოტივირებელ ხედვაზე, აუცილებელ უნარებზე, ინსტრუმენტებსა და რესურსებზე ისაუბრეს, ასევე დამსწრე საზოგადოებას EPAM-ის ქსელური შესაძლებლობები და მონაცემთა სფეროში მარტივი ნავიგაციისთვის საჭირო რჩევები გაუზიარეს.

ღონისძიებაზე დეტალურად განიხილეს როგორ ქმნის მონაცემთა პროგრამული უზრუნველყოფის ინჟინერიის გუნდი ძლიერ, მასშტაბირებად გადაწყვეტილებებს, როგორ გარდაქმნიან მონაცემთა ანალიტიკისა და ვიზუალიზაციის ინჟინრები მონაცემებს მიმზიდველ, ქმედით ანალიტიკად და როგორ იყენებენ ბიზნეს ანალიტიკოსები ნედლ მონაცემებს სტრატეგიულ გადაწყვეტილებებში.

EPAM-ი პროგრამული უზრუნველყოფის შემმუშავებელი კომპანია, რომელიც 1993 წლიდან ფუნქციონირებს. ორგანიზაცია მომსახურებას 6 კონტინენტზე, 55 ქვეყანაში სწევს და მომხმარებლებს მნიშვნელოვან ინოვაციებს, ციფრულ ტრანსფორმაციას და ბიზნეს გადაწყვეტებს სთავაზობს.