29 ივნისს, საქართველოს უნივერსიტეტში V-Dem Caucasus-ის რეგიონალური ცენტრის ოფიციალური გახსნის ღონისძიება გაიმართა.
ახალი ცენტრი, რომელიც საქართველოს უნივერსიტეტის ბაზაზე დაფუძნდა, მსოფლიოში ერთ-ერთი ყველაზე ავტორიტეტული კვლევითი ინსტიტუტის შვედეთის გოტენბურგის უნივერსიტეტთან არსებული Varieties of Democracy-ის ოფიციალურ წარმომადგენლობასა და მთავარ კვლევით ჰაბს წარმოადგენს სამხრეთ კავკასიაში.
V-Dem Caucasus-ის სამოქმედო არეალი საქართველოს, სომხეთსა და აზერბაიჯანს მოიცავს, ხოლო მისი მთავარი მიზანი V-Dem-ის გლობალურ მონაცემებსა და ადგილობრივ ემპირიულ კვლევებზე დაყრდნობით, რეგიონში მიმდინარე დემოკრატიული ტრანსფორმაციების, ინსტიტუციური ცვლილებებისა და საზოგადოებრივი პროცესების სიღრმისეული კვლევაა.
ღონისძიება მთავარი მოხსენებით V-Dem Institute-ის დირექტორმა, სტივენ უილსონმა გახსნა. მან აუდიტორიას წარუდგინა მოხსენება თემაზე - „დემოკრატიის მდგომარეობა და ტენდენციები დღევანდელ მსოფლიოში“. ოფიციალური ნაწილისა და პრეზენტაციის შემდეგ, ღონისძიების ფარგლებში გაიმართა პანელური დისკუსიაც, სადაც მონაწილეებმა მსოფლიოსა და კავკასიის რეგიონში დემოკრატიის კუთხით არსებული მდგომარეობა განიხილეს.
"საქართველოს უნივერსიტეტში დაფუძნდა V-Dem - ის წარმომადგენლობა, რომელიც მთელი კავკასიის რეგიონის მასშტაბზე შეძლებს მუშაობას და კვლევითი ღონისძიებების ჩატარებას. ერთის მხრივ ხელს შეუწყობს რეგიონალურ კოლაბორაციას და მეორეს მხრივ შედეგების მსოფლიო მასშტაბით გავრცობას" - გვიზიარებს კონსტანტინე თოფურია
V-Dem Caucasus ცენტრი შექმნის ცოდნას, თუ როგორ მიმდინარეობს დემოკრატიული პროცესები, როგორც საქართველოში, ასევე კავკასიის რეგიონში, რა გამოწვევებს აწყდებიან მეზობელი სახელმწიფოები და რა სახის მიღწევებს აერთიანებს მათი თანამშრომლობა - საერთაშორისო არეალზე.
