26 მარტს, საქართველოს უნივერსიტეტსა და  საინფორმაციო ტექნოლოგიების ცენტრ „მზიურს“ შორის ურთიერთთანამშრომლობის მემორანდუმი გაფორმდა. თანამშრომლობის ფარგლებში კომპანიები გამოხატავენ მზადყოფნას სტუდენტთა და ორგანიზაციის მოსწავლეთა პროფესიული დაოსტატებისა და განვითარების მიზნით, ხელი შეუწყონ თეორიული და პრაქტიკული გამოცდილების მიღებასა და გაღრმავებას. 

საქართველოს უნივერსიტეტი და საინფორმაციო ტექნოლოგიების ცენტრი „მზიური“ უზრუნველყოფენ: 

• ერთობლივი პროგრამების დაგეგმვასა და განხორციელებას, რომელიც მიმართულია საგანმანათლებლო საქმიანობისა და სტუდენტების და ორგანიზაციის მოსწავლეთა  პროფესიული განვითარების ხელშეწყობისკენ; 
• კვალიფიციური განათლების განვითარების  ხელშეწყობას, რაც გულისხმობს, მაგრამ არ შემოიფარგლება, ინფორმაციული ტექნოლოგიების მიმართულებით კვლევების, საგანამანათლებლო საქმიანობისა და სტუდენტებისა და ორგანიზაციის მოსწავლეთა  პროფესიული განვითარების ხელშეწყობით; 
• პრაქტიკული საქმიანობისათვის აუცილებელი პროფესიული უნარ-ჩვევების განვითარების მიზნით უნივერსიტეტის სტუდენტების პრაქტიკისა და სტაჟირების ხელშეწყობას; 
• საჯარო ლექციების, სემინარების, ტრენინგებისა და მასტერკლასების ორგანიზებას უნივერსიტეტის სტუდენტებისათვის; 
• ერთობლივი სემინარების, შეხვედრების, ოლიმპიადების, კონკურსების, კონფერენციებისა და მსგავსი ტიპის ღონისძიებების დაგეგმვასა და მათში მონაწილეობას.