თამარ მაჭავარიანი, ფილოლოგიის დოქტორი, სახელმწიფო მმართველობის მაგისტრი
საქართველოს ტექნიკური უნივერსიტეტის ასოცირებული პროფესორი,
SDSU-საქართევლო, მოწვეული პროფესორი თამარ მაჭავარიანი მრავალი ათეული წელია ასწავლის ინგლისურ ენას, კომუნიკაციას, თარგმნის თეორიასა და პრაქტიკას საქართველოს სხვადასხვა უნივერსიტეტებში. პედაგოგიური მოღვაწეობის გარდა, მას პროფესიონალ მთარგმნელად და სინქრონულ თარჯიმნად მუშაობის დიდი გამოცდილება აქვს, რომელიც მოიცავს წლების მანძილზე არაერთ უცხოურ და ადგილობრივ კომპანიასა და საერთაშორისო ორგანიზაციასთან თანამშრომლობას. ამავე დროს, მისი კარიერა სახელმწიფო მმართველობისა და ბიზნესის ადმინისტრირების ხაზითაც განვითარდა. იგი 20 წელი მუშაობდა კორპორაცია "შევრონ"-ში სამთავრობო და საზოგადოებრივ ურთიერთობათა კოორდინატორად და საქართველოში მისი წარმომადგენლობის დირექტორად. ქალბატონი თამარი სხვადასხვა დროს ადგილობრივი ექსპერტის სტატუსით მონაწილეობდა ევროკავშირის, ნატოს, გაეროს განვითარების პროგრამისა (UNDP) და სხვა დონორების მიერ დაფინანსებულ პროექტებში, რომელთა თემატიკა მოიცავდა სახელმწიფო სამსახურის რეფორმასა და მოხელეთა გადამზადებას, საქართველოში სხვადასხვა დარგის პერსონალის პროფესიული მომზადებისა და კვალიფიკაციის ამაღლების ხელშეწყობას, თანამედროვე სასწავლო მეთოდოლოგიების დანერგვასა და სხვა. ამჟამად მისი ინტერესის სფეროა პედაგოგიური მოღვაწეობა.
