საქართველოს უნივერსიტეტის ჯანმრთელობის მეცნიერებების სკოლის ფარმაციის დეპარტამენტის უფროსი, მარინა დარახველიძე საქართველოს ჯანდაცვის ასოციაციის წევრ ჰოსპიტალური სექტორის  წარმომადგენლებთან ერთად, მიმდინარე წლის 21-26 ოქტომბერს, ვიზიტით იმყოფებოდა სამხრეთ კორეაში, სეულში.

 საქართველოს ჯანდაცვის სექტორი, მიმდინარე რეფორმების გამო (აკრედიტაცია, DRG სისტემის დანერგვა და სხვა), მრავალი გამოწვევის წინაშე დგას. სამხრეთ კორეის ჯანდაცვის სისტემის მოწყობა ძალიან ახლოს არის საქართველოსთან და ასოციაციის წევრებისათვის საინტერესო იყო სამხრეთ კორეული ჯანდაცვის სისტემის წარმატებული გამოცდილების გაზიარება. 

საქართველოს უნივერსიტეტი მოწოდებულია, ყოველთვის იყოს ჯანდაცვის სფეროში მიმდინარე მოვლენების საქმის კურსში და შესაბამისად, აქტიური მონაწილეობა მიიღო საერთაშორისო კომპანია „Dialog Health“ -ის  მიერ ორგანიზებულ საინტერესო და ნაყოფიერ ვიზიტში.

შეხვედრები გაიმართა ჯანმრთელობის დაზღვევის ეროვნული სამსახურს (NHIS), ჯანდაცვის დაზღვევის მიმოხილვისა და შეფასების სამსახურს (HIRA), მიონჯის კლინიკას, ასანის სამედიცინო ცენტრს, სეულის ბავშვთა საავადმყოფოს,  საექთნო მოვლის სახლს, სამსუნგის ჰოსპიტალსა და პირველადი ჯანდაცვის კლინიკებში.