როგორც კი მივიღე საქართველოს უნივერსიტეტისგან შეტყობინება, რომ შესაძლობლობა მქონდა, ბელგიაში მესწავლა ერთი სემესტრით, შანსი ხელიდან არ გამიშვია და აი, ვიღებ კიდეც ჩემს ცხოვრებაში ყველაზე შთამბეჭდავ გამოცდილებას. AP University of Applied Sciences and Arts ის ადგილია, სადაც შეგიძლია, ევროპული, მაღალი ხარისხის, პრაქტიკით გაჯერებული განათლება მიიღო და სტუდენტური ცხოვრებაც საკმაოდ მრავალფეროვანი გქონდეს. ანტვერპენში, ქალაქში, რომელიც ასე შემიყვარდა, სწავლამ სულ სხვა თვალით დამანახა სამყარო და დამეხმარა, ბევრი რამ აღმომეჩინა საკუთარ თავში. ახლა დანამდვილებით ვიცი, რომ შემიძლია, საზღვარგარეთ სწავლასა თუ დამოუკიდებლად ცხოვრებას თავისუფლად გავუმკლავდე, სწორად განვკარგო საკუთარი რესურსები და დავისახო უფრო მეტი მიზანი. ასევე ვიცი, რომ თუ რაიმეს გულით მოინდომებ და იშრომებ კიდეც მის მოსაპოვებლად, იმედგაცრუებული არასდროს დარჩები.
ვფიქრობ, ერასმუსი საუკეთესო რამ არის, რაც სტუდენტებმა საკუთარ თავს შეიძლება გაუკეთონ, რადგან ეს პროგრამა გვაახლოვებს ერებს, გვხდის უფრო კომპეტენტურსა და თავდაჯერებულს, უდიდეს ადგილს იკავებს ჩვენს პროფესიულ განვითარებაში, გვამარაგებს საჭირო უნარებითა და ცოდნით და კიდევ ერთხელ გვააზრებინებს, თუ რატომ მივესწრაფვით ევროპას.
როგორც სტუდენტი, უამრავი კარგი შემთხვევით ვსარგებლობ და მინიმალური ხარჯით ვმოგზაურობ, ვსტუმრობ მუზეუმებს და ვიხდენ ოცნებებს. ამასთან, ჩვენს ქვეყანას ვაცნობ ადამიანებს მსოფლიოს სხვადასხვა წერტილიდან და თავადაც ბევრს ვიგებ მათზე. მიუხედავად იმისა, რომ ბელგიაში სწავლა ჩემი უდიდესი მიღწევაა, ეს მოტივაციას კიდევ უფრო მმატებს და ახალი მიღწევებისთვის მამზადებს.
დასასრულ, მინდა, გულწრფელი მადლობა გადავუხადო საქართველოს უნივერსიტეტს, რომელმაც ეს შესაძლებლობა მომცა. ვამაყობ ჩემი არჩევანით!
