ცხოვრების ერთ-ერთ ყველაზე მნიშვნელოვან და ნაყოფიერ პერიოდად, სწორედ ის დრო აღიქმება ჩემთვის, როდესაც მივიღე შესაძლებლობა ,,Erasmus +’’ პროგრამით გავმგზავრებულიყავი რუმინეთში, ქალაქ იასში და მესწავლა ქვეყნის ყველაზე ძველ, ამავდროულად ერთ-ერთ საუკეთსო უნივერსიტეტში. (Alexandru Ioan Cuza University) 

ჩემი მოლოდინები რეალობად იქცა და გადააჭარბა კიდეც. ამ დროის განმავლობაში, შევიძინე არაერთი საერთაშორისო მეგობარი. მივიღე დაუვიწყარი მოგონებები. რასაც, რა თქმა უნდა, თან ახლდა დაბრკოლებებიც, რაც კომფორტის ზონიდან გამოსვლით აიხსნება, თუმცა ეს ყოველივე პიროვნული ზრდისთვის და განვითარებისთვის უნიკალური შესაძლებლობაა. 

სასწავლო გარემო, ერთ-ერთი გამორჩეული პლუსი აღმოჩნდა ჩემთვის. ძალიან საინტერესო და გამოცდილ ლექტორებს, რომლებსაც თან ახლდათ შესანიშნავი სტუდენტები, ქმინდა განსხვავებულ, თუმცა ძალიან ნაყოფიერ პროცეს, რამაც მომცა საშუალება პროფესიულად მნიშვნელოვნად გავზრდილიყავი.

საბოლოოდ, მსურს გადავუხადო მადლობა საქართველოს უნივერსიტეტს ამ შესაძლებლობის მოცემისთვის და ვურჩიო ყველა სტუდენტს აუცილებლად გამოიყენონ ეს უნიკალური შანსი.

სტუდენტობის პირველივე სემესტრიდან ვიცოდი, რომ თუ მაღალი აკადემიური მოსწრება მექნებოდა, შესაძლებლობა მექნებოდა მონაწილეობა მიმეღო გაცვლით პროგრამაში საზღვარგარეთ, რომელსაც არამარტო პროფესიის სიღრმისეული ცოდნა მოჰყვება, ასევე პიროვნული განვითარება.

საპიენცამ, ევროპის ერთ-ერთმა უძველესმა უნივერსიტეტმა რომში, მომცა შესაძლებლობა გამეცნო და შემესწავლა იტალიური კულტურა, დამეხმარა ჩემი პროფესიის ხედვის გაღრმავებაში, რაც კარიერული წინსვლისთვის დიდი ნაბიჯია.

თუ გსურთ, საზღვარგარეთ სწავლის გამოცდილების მიღება, გირჩევთ მიიღოთ მონაწილეობა ჩვენი უნივერსიტეტის გაცვლით პროგრამებში, რომელთა მიღებასაც საერთაშორისო ურთიერთობების დეპარტამენტი ხშირად აცხადებს. განსაკუთრებულად მინდა მათ მადლობა გადავუხადო, რადგან  ყოველთვის ყველა საკითხში მეხმარებოდნენ, დაკვალიანებასა თუ მოგვარებაში.

წარმატებები.

გერმანიის ქალაქ ჰამბურგში გავატარე 4 თვე და ვისწავლე ბუცერიუსის სამართლის სკოლაში. ეს არის სამართლის პირველი კერძო სკოლა, რომელიც გერმანიაში დაარსდა და კვლევების უმრავლესობის მიხედვით, დღემდე მიჩნეულია ქვეყანაში საუკეთესო სამართლის სკოლად. ჩემი სასწავლო მიმართულება იყო საერთაშორისო და შედარებითი ბიზნეს სამართალი. 

ჩემზე განსაკუთრებული შთაბეჭდილება მოახდინეს კურსის ლექტორებმა. პროგრამას უძღვებოდნენ როგორც ადგილობრივი, ასევე საერთაშორისო მოწვეული ლექტორები, რომლებიც თეორიული სწავლების გარდა კურსს ავსებდნენ შემეცნებითი და პრაქტიკული აქტივობებით, რაც კიდევ უფრო საინტერესოს ხდიდა სწავლის პროცესს. 

პროგრამაში მონაწილეობდა 90-მდე სტუდენტი მსოფლიოს 24 ქვეყნიდან.  კულტურული მრავალფეროვნება და განსხვავებულ ადამიანებთან ურთიერთობა იყო დაუვიწყარი გამოცდილება, რომელიც პიროვნულ განვითარებაში დამეხმარა.

აღსანიშნავია ქალაქი ჰამბურგი -  გერმანიაში ერთ-ერთი ყველაზე ლამაზი, მწვანე, ეკომეგობრული ქალაქი. აქ აუცილებლად მოგხვდებათ თვალში მშვენიერი ბუნება და ტბები, რომელიც საოცრად ერწყმის ურბანულ გარემოს. ეს არის გერმანიის უმშვენიერესი საპორტო ქალაქი, რომელში უბრალო გასეირნებაც საინტერესო თავგადასავალია.

მიხარია, რომ საქართველოს უნივერსიტეტის დახმარებით, 2023 წლის შემოდგომის სემესტრი გავატარე ამ ქალაქში, სადაც გავაუმჯობესე ჩემი პროფესიული და პიროვნული უნარები, მივიღე პრაქტიკული ცოდნა და დაუვიწყარი გამოცდილება.

ხშირად მითქვამს და კვლავ განვმეორდები, რომ საქართველოს უნივერსიტეტში ჩაბარება იყო ჩემი ერთ-ერთი საუკეთესო გადაწყვეტილება. საბაკალავრო პროგრამის წარმატებით დამთავრების შემდეგ, სამაგისტრო პროგრამის შესწავლა და ამ მხრივ, ჩემი ცოდნის გაღრმავება ისევ საქართველოს უნივერსიტეტს მივანდე. სტუდენტობის პერიოდში, მიზნად მქონდა დასახული ესპანეთში სწავლის გაგრძელება, აღნიშნული მიზნის რეალობად ქცევაში კი საქართველოს უნივერსიტეტი დამეხმარა და მადრიდში გაცვლით პროგრამაში მონაწილეობა შემომთავაზა. 5 თვის განმავლობაში ვსწავლობდი მადრიდში, Universidad de Nebrija-ს უნივერსიტეტში. უნივერსიტეტში, რომელიც სინათლის სიჩქარით მიიწევს აკადემიური სრულყოფისაკენ, სტუდენტებს სთავაზობს ინოვაციურ, მულტიდისციპლინურ პროგრამებს და მყარად პოზიციონირებს ევროპაში ყველაზე მნიშვნელოვანი საუნივერსიტეტო რეიტინგების პირველ ადგილებზე. Nebrija-ს უნივერსიტეტმა მომცა საშუალება დავსწრებოდი საერთაშორისო სამართლის გამოჩენილი მკვლევარების ლექციებს, რამაც ცხადია, უფრო მეტად გააღრმავა ჩემი აღქმა საერთაშორისო საკანონმდებლო ჩარჩოების შესახებ. აღნიშნული გამოცდილება დაუვიწყარი იყო, რადგან შესაძლებლობა მომეცა არა მხოლოდ გამეღრმავებინა საკუთარი ცოდნა ადამიანის უფლებათა საერთაშორისო სამართლის შესახებ, არამედ სწორედ გამომეყენებინა საუნივერსიტეტო პლატფორმა, სადაც გლობალური სამართლებრივი გამოწვევების ანალიზისას წარმოვადგენდი საქართველოს მნიშვნელოვან როლსა და ღირებულებებს. აკადემიური სფეროს მიღმა, მადრიდში გაცვლითი პროგრამის ფარგლებში ენობრივი ბარიერების გადალახვა და ახალ კულტურულ ნორმებთან ადაპტაცია იყო გამოწვევები, რამაც ხელი შეუწყო ჩემს პიროვნულ ზრდას. საშუალება მომეცა შემეძინა ღირებული კავშირები, მეგობრები და მომავალი კოლეგები სხვადასხვა ქვეყნიდან. ასევე, გავცნობოდი ესპანეთის ისტორიასა და კულტურას, რამაც ეს გამოცდილება კიდევ უფრო მრავალფეროვანი და პოზიტიური გახადა. მიმაჩნია, რომ საერთაშორისო გამოცდილებისა და მაღალი ხარისხის განათლების მისაღებად საქართველოს უნივერსიტეტი საუკეთესო არჩევანია. ეს უნივერსიტეტი ნამდვილად არის ის ადგილი, სადაც სტუდენტის თითოეული ნაბიჯი დაფასებულია.

მე გახლავართ თინათინ ზაალიშვილი. საქართველოს უნივერსიტეტის საერთაშორისო ურთიერთობების საბაკალავრო პროგრამის დამამთავრებელი კურსის სტუდენტი. უაღრესად მადლობელი ვარ, რომ საქართველოს უნივერსიტეტმა მომცა შესაძლებლობა, გამეტარებინა გაცვლითი სემესტრი საპიენცას უნივერსიტეტში, იტალიაში, რომელიც ევროპაში ერთ-ერთ ყველაზე ძველ და ყველაზე დიდ უნივერსიტეტს წარმოადგენს. მისი მისიაა, რომ შექმნას კომფორტული საგანმანათლებლო სივრცე სტუდენტებისთვის. აღსანიშნავია, რომ საპიენცას უნივერსიტეტი, აგრეთვე, გახლავთ მსოფლიოში ყველაზე გავლენიანი უნივერსიტეტების სიაში და იკავებს პირველ ადგილს იტალიის უნივერსიტეტების ჩამონათვალში, რადგან გამოირჩევა განათლების ხარისხის მაღალი მაჩვენებლითა და ადგილობრივი, თუ საერთაშორისო მასშტაბით მრავალი კვლევითი ცენტრის არსებობით. როგორც საერთაშორისო სტუდენტს, იქ სწავლის პერიოდში განმივითარდა ლიდერობის უნარები, გავხდი მეტად თავდაჯერებული, შრომიმსმოყვარე და აღმოვაჩინე, თუ როგორი კომპლექსურია ჩემს გარშემო სამყარო, გავიცანი ადგილობრივი მოქალაქეები, ასევე, მომეცა შესაძლებლობა, რომ გავცნობოდი მათ კულტურასა და ისტორიას, რამაც საბოლოო ჯამში უდიდესი როლი შეასრულა ჩემს პიროვნულ ზრდაში, ასევე, ჩემი აკადემიური შესაძლებლობებისა და ცოდნის განვითარებაში. შემიძლია თამამად ვთქვა, რომ საპიენცას უნივერსიტეტში პოლიტიკის მეცნიერებების ფაკულტეტზე სწავლა იყო საუკეთესო პერიოდი ჩემს ცხოვრებაში, მრავალი გამოწვევითა და სირთულით სავსე. საბოლოო ჯამში, კიდევ ერთხელ გადავუხდი მადლობას საქართველოს უნივერსიტეტს იმისთვის, რომ ხშირად გვანებივრებს სტუდენტებს მსგავსი შესაძლებლობებით. 

რუმინულ-ამერიკული უნივერსიტეტი ქ. ბუქარესტში აღმოჩნდა პროგრესული, სიახლეებითა და სიურპრიზებით სავსე უმაღლესი სასწავლო დაწესებულება. გარემო, რომელშიც თითქმის ნახევარი წელი გავატარე, იყო საერთაშორისო, სრული ამ სიტყვის მნიშვნელობით. ინგლისურენოვანი პროგრამებიდან ერთ-ერთს, საერთაშორისო ბიზნესს ვსწავლობდი და მივიღე პრაქტიკული ცოდნა გამოცდილი პროფესორებისგან, გამორჩეული და რელევანტული თეორიული მასალა და დარგობრივი რჩევები სპეციალისტებისგან. აკადემიური პერსონალი და ადმინისტრაცია სრული პასუხისმგებლობით ახორციელებენ თავიანთ მოვალეობებს, დაგვახვედრეს ტოლერანტული, პლურალისტული ატმოსფერო, გვაზიარეს ქვეყნის კულტურას, ამრიგად ადაპტაციის პროცესში ბოლომდე ჩვენს გვერდით იყვნენ. 

ვფიქრობ, რუმინულ-ამერიკულ უნივერსიტეტში სილაბუსები მაქსიმალურად ეფექტიანად არის შედგენილი, ლექციები და სემინარები კი მაქსიმალურად ასრულებდნენ დაკისრებულ ფუნქციებს. 

ამ ყველაფრის ფონზე კი აღსანიშნავია, რომ რუმინეთი მართლაც მისტიური, ფერადი, ლამაზი და სიცოცხლით სავსე ქვეყანა არის. დრაკულას სასახლე და მიმდებარე ქალაქები, როგორიც არის ბრაშოვი, კლუჟ-ნაპოკა, სიგიშოარა, კონსტანცა გულგრილს არავის დატოვებს!

ბოლოს კი, სრული თავდაჯერებულობით შემიძლია ვთქვა, რომ ამ ქალაქში, ამ უნივერსიტეტში მეორედ აუცილებლად დავბრუნდებოდი.

რუმინეთს ვუსურვებ მდგრად განვითარებას და ევროკავშირში ინტეგრაციის შემდგომი ეტაპის წარმატებულად შესრულებას.